KOALICION  KOMBETAR  PER  MJEDISIN

    Mjedisi është sektori më i anashkaluar nga politika shqiptare dhe për mbrojtjen e tij nuk është investuar asnjëherë aq sa duhet. Ligjet ekzistuese nuk zbatohen, e mandej përçapjet për përmirësimin e tyre kanë mbetur në mes të rrugës. Të tilla shqetësime u diskutuan në tryezën e parë kombëtare të Koalicionit Kombëtar për Mjedisin në Shqipëri, të organizuar nga Instituti i Kërkimeve Urbane, më 17 shkurt 2010.Takimi u zhvillua me mbështetjen e Ambasadës të Mbretërisë së Hollandës në Tiranë, në kuadër të fushatës mjedisore të nismuar nga Lëvizja BELLS dhe projektit “REA – Regional Environmental Advocacy, Action and Cohesion in the Westerns Balkans” dhe  u drejtua nga Kordinatori Kombëtar i Lëvizjes BELLS dhe Projektit REA në Shqipëri, z. Edlir Vokopola.

   Në takim morën pjesë dhe diskutuan, Ambasadori i Mbretërisë së Hollandës në Tiranë, z. Van den Dool, kryetari i Komisionit Parlamentar për Aktivitetet Prodhuese, Tregtinë dhe Mjedisin, z. Jemin Gjana; zëvendësministri i Mjedisit, Pyjeve dhe Administrimit të Ujërave, z. Taulant Bino; si dhe deputetë të Kuvendit të Shqipërisë ,deputetë nga kuvendet e Kosovës dhe Maqedonisë, kryetarë të Bashkive të qyteteve më të mëdha të vendit, përfaqësues nga pushteti vendor, nga shoqëria civile dhe media, si dhe përfaqësues të rrjetit REA nga Mali i Zi, Kosova e Maqedonia.

   Takimi rezultoi me sukses në krijimin  e KoalicioniT Kombëtar për Mjedisin në Shqipëri, i cili tashmë ka në përbërjen e tij 64 antare nga te cilet 8 përfaqësues të Parlamentit, deputetë të Partisë Socialiste dhe Partisë Demokratike ,qeverinë vendore e përfaqësuar nga 5 kryetarë bashkish, shoqëria civile e cila perfaqesohet me 28 organiziata, përfaqësues të medias, biznesit dhe individë të tjerë të interesuar. Anëtarët e Koalicionit firmosën edhe një Memorandum Mirëkuptimi, duke i hapur rrugën një procesi të rëndësishëm që do të ketë në fokusin e saj prioritizimin e problemeve, ndërgjegjësimin dhe lobbimin për përmirësimin e politikave mjedisore në vendin tonë.

Objektivat kryesore të Koalicionit Kombëtar për Mjedisin janë: rritja e ndërgjegjësimit dhe kapaciteteve institucionale të aktorëve të interesit që çështjet e mjedisit të bëhen prioritare në politikat dhe punën për zhvillim; rritja e bashkëpunimit ndër-sektorial për zbatimin e nismave për mjedisin; rritja e bashkëpunimit rajonal; përmirësimi i njohurive të aktorëve të interesit mbi standardet dhe vlerat e BE mbi mjedisin; të shpejtohet harmonizimi i legjislacionit shqiptar me standardet ligjore mjedisore të Bashkimit Evropian, etj.