MBETJET  URBANE  DHE  RICIKLIMI  NE  FOKUSIN  E  POLITIKES

   Problemi i mbetjeve urbane dhe riciklimit të tyre u mor në shqyrtim në veprimtarinë "Politikat mjedisore për Riciklim" , organizuar në korrik nga Ministria e Mjedisit , në bashkëpunim me biznesin e riciklimit të mbetjeve urbane.

   Ka kohë që MMPAU , së bashku me strategjinë për mbetjet urbane dhe planin e veprimit për mbetjet  , po punon që ti shoqërojë edhe me disa ligje të rëndësishme, duke përmirësuar në këtë mënyrë kuadrin ligjor ekzistues në Shqipëri për trajtimin e këtyre mbetjeve urbane , edhe si një kusht themeltar në politikat e Bashkimit Evropian.Njëri prej këtyre ligjeve është edhe ai i mbrojtjes së mjedisit, ligji për lejet mjedisore dhe ai për vlerësimin e ndikimit në mjedis, draftet e të cilëve presin të kalojnë në parlament. Ndërkohë qeveria cila ka ngritur edhe një Task Force, shoqëruar me një plan veprimi përkatës.

   Në fjalën e tij , ministry Mediu theksoi se "në këto dokumente parashikohen objektiva të qarta për riciklimin e mbetjeve, reduktimin e gjenerimit të tyre, nxitjen e teknologjive të ripërdorimit të mbetjeve dhe më kryesorja, riciklimin e mbetjeve, por situata aktuale e iniciativave për riciklimin e mbetjeve tregon se ato jane ende në nivel të ulët".

Në këtë drejtim, Mediu tha se, "qeveria por edhe nga vete biznesi, ky sektor duhet të shihet me interes ekonomik por dhe si nje biznes i të ardhmes. Realizimi me sukses i këtij objektivi kërkon patjetër të shoqërohet me programe edukimi mjedisor për publikun dhe familjarët", duke bërë të ditur bashkëpunim me donatorët, ministrine e Arsimit dhe Shkences për përfshirjen në programet shkollore.

   Mediu cilësoi si shqetësim të madh mjedisor problemin e mbetjeve plastike, metalike e veçanërisht makinat e dala jashtë përdorimit. "Iniciativat për të investuar në riciklimin e veçanërisht të këtyre mbetjeve, përben prioritet për MMPAU", tha ai.

   Përfaqësuesi i Shoqatës së Riciklueseve, Bardhyl Baltëza bëri të ditur se në Shqipëri biznesi ka investuar rreth 100 milion euro në industrinë e riciklimit dhe këto investime janë reale. Sipas tij, " kjo industri funksionon por fatkeqësisht jo me kapacitete të plota, sepse në Shqipëri mungon zinxhiri i grumbullimit dhe i vlerësimit të mbetjeve urbane. Ne akoma nuk e kemi vlerësuar këtë rrymë si lëndë e parë për një industri mjaft të rëndësishme", tha ai.

  Ndërsa vuri në dukje punën e bërë nga qeveria para standardeve të kërkuara nga BE për riciklimin e letrës dhe të plastikës, Baltëza tha se industria private e riciklimit ka kapacitete për të ricikluar rreth 35-40% të letrës, rreth 50% të plastikës, ndërsa bëri të ditur me kënaqësi se "sot po bëhen prova në një fabrikë të re të riciklimit të baterive që janë mbetje të rrezikshme".