A  DO  TI  PRESIM  PYJET  PER  FRUTA ?

   Në zbatim të programit të qeverisë për bujqësinë , Agjencia për Zhvillim Bujqësor dhe Rural për vitin 2012 ka filluar të mbështesë fermerët sipas disa skemave financiare . Këtu përfshihen prodhimi i ullinjve , arrës e lajthisë , shegës e dhe rrushit , mollës, dardhës, kumbullës , qershive, pjeshkës , ftoit e deri tek agrumet , kivi dhe luleshtrydhja . Të bie në sy se mbështetja jepet për format intensive të kultivimit dhe për format tradicionale.

  Sigurisht është për tu lavdëruar si një përparim i dukshëm në rritjen e ekonomisë rurale që do të sjellë , me prodhimin e pritshëm , rritjen e përfitimeve social-ekonomike për zonat në fjalë e po ashtu për gjithë vendin . Një kohësisht do të shkëputemi nga importi i prodhimeve të tilla gjë që do të kursejë dhe valutën tonë .

   Por mendojmë se kanë dalë dy probleme . I pari është vënë re që pa filluar zbatimi i kësaj skeme dhe që ka të bëjë me ruajtjen apo dhe zhvillimin e pyjeve jo frutorë . Për shumë vite kemi prerë e shkatërruar sipërfaqe të mëdha të tyre , diku edhe me leje por më shumë pa leje . Rezultatet rashmë i kemi parë , ku dhe në administrimin nga komunat , në shumë raste , ishin këto vetë e titullarët e tyre që shfrytëzuan pothuajse pa kriter në emër të përfitimeve ekonomike nga popullsia e zonave . Shembulli i pyjeve në disa komuna të Ersekës e gjetkë e tregoi këtë .

   Tashti , po nën administrimin e komunave , kanë filluar të priten këto pyje me qëllim mbjelljen e pemëve frutore sipas skemës së re dhe politikës për shndrrimin e Shqipërisë në prodhues të madh të frutave , sidomos të arrorëve e ullishteve . Çdo të bëhet me pyjet që kanë “fatin e keq” të mos jenë frutorë ? Do t’i presim për t’i zëvëndësuar me lajthi e ullinj apo do të shfrytëzojmë sipërfaqe të tjera ku nuk ka pyje ? Fillimi tregon se po ju biem në qafë pyjeve që , veç përfitimit të investimeve për mbjelljet e pemëve frutore japin dhe përfitimin tjetër të menjëhershën të shfrytëzimit të lëndës së parë .

  Problemi i dytë lind nga një treguesët financiarë të mbështetjes qeveritare për fermerët . Në shumë raste , kjo mbështetje financiare , është më e madhe për format intensive të kultivimit dhe më e vogël për format tradicionale . Kjo do të thotë se mbështetet më tepër bujqësia intensive që kërkon dhe bëhet me ndikimin plehrave kimikë , pesticide e ndofta edhe me ndryshime gjenetike . Por , në këtë mënyrë do të lihen pas dorë mënyrat e kultivimit   tradicionale të cilat të çojnë tek rikthimi në atë që sot quhet bioprodhimtari , e kërkuar përherë e më shumë sot në botë . Kjo , jo vetëm për cilësinë e lartë të prodhimeve por dhe çmimit më të lartë të tyre në tregun botëror që është dhe një përfitim më tepër . Dhe e gjithë kjo do të bëhet sepse fermerët do të udhëhiqen nga mbështetja më e madhe financiare , prodhimit më të madh dhe kohës më të vogël të arritjes së rezultateve , domethënë shlyerjen e kredisë .Dhe kjo në kohën kur po kërkohet që e gjithë ekonomia të bëhet e qëndrueshme .

  Këto subvencione janë pa dyshim të mirëpritura dhe shpresojmë se qeveria i ka marrë parasysh pasoja të tilla si ato që ngritëm më lart . Sepse , si të gjithë , edhe ne duhet të zgjedhim rrugën e duhur të zhvillimit. Le ta nisim atje ku duhet .

A. DALIPI